Bintan ကိုသွားဖို့ ဖယ်ရီ သင်္ဘောလက်မှတ်လည်း သီရိပဲ သူ့ဟာသူရှာပြီး online ကနေ လက်မှတ်ဝယ်ပြီး Bintan Resort Ferries ဆိုတဲ့ဟာနဲ့ သွားကြတယ်။ ဟိုကို ရောက်တော့လည်း အင်ဒိုနီးရှားက မြန်မာပတ်စပို့ဆိုရင် ဆိုက်ရောက်ဗီဇာရတော့ တစ်ခါထည်း တန်းစီဝင်လိုက်ရုံပါပဲ။ ပထမတစ်ခေါက်တုန်းက တော့ ကလေးကလည်းငယ်သေး၊ အဖိုး၊အဘွားတွေလည်းပါတော့ အဲဒီကဝန်ထမ်းက တန်းမစီရတဲ့ ဦးစားပေးလမ်းက ဝင်မလားလာမေးသေးတယ်။ စင်ကာပူကလို မဟုတ်ပဲ ပိုက်ဆံ ဘယ်နှစ်ဒေါ်လာဆိုလား သူ့ကို ပေးရမယ်ဆိုလို့ ဦးစားပေးလမ်း မသွားပဲ ကိုယ့်ဟာကိုယ်တန်းစီပြီးပဲ သွားခဲ့လိုက်တယ်။ ဖယ်ရီဆိပ်က ထွက်လာတော့ ဟိုတယ်က ဘစ်ကားက အဆင့်စောင့်ကြိုနေတော့ တက်စီးလိုက်ရုံပါပဲ။ သင်္ဘောစီးတာ ၄၅ မိနစ်၊ ဟော်တယ်ရောက်အောင် ဘစ်ကားစီးရတာ ၁ နာရီလောက်ကြာတယ်။
ဟိုတယ်ရောက်တော့ ၁၂ နာရီကျမှ check in ဝင်လို့ရမှာမို့ ဧည့်ကြိုကောင်တာ ရှိတဲ့ စားသောက်ဆိုင်မှာ ထိုင်အမောဖြေ စားသောက်ရင်း စောင့်ကြတယ်။ ပထမ အခေါက်ကတော့ ပင်လယ်နဲ့ မျက်နှာချင်းဆိုင်နေတဲ့ အခန်းလေးတွေထဲက အနီရောင်ခေါင်မိုးလေးရဲ့ အလယ်အခန်းရပါတယ်။
နောက်တစ်ခေါက်ကျတော့ ရေပေါ်ကို ထွက်နေတဲ့ ဖက်က အစွန်ဆုံးအခန်း။
ရေကသိပ်မကြည်လောက်ဘူး မှန်းထားပေမယ့် ထင်သလောက် မဆိုးပါဘူး။ ရေကူးလို့ ကောင်းပါတယ်။ ဝင်ကစွပ်တွေ၊ ခရု၊ ဂဏန်း၊ ဂျယ်လီငါးတွေ တွေ့တယ်။ ဂျယ်လီငါး တချို့က အဆိပ်ပြင်းတယ် ကြားလို့ မထိရဲဘူး။ သဲထဲမှာပုန်းနေ တတ်တဲ့ ဂဏန်းလေးတစ်ကောင်တော့ မိအောင်ဖမ်း သမီးကို ပြပြီး ပြန်လွှတ်လိုက်တယ်။ ဂဏန်းလေးက တော်တော်လှတယ်။ ရေထဲဆင်းနေတာဆိုတော့ ဓာတ်ပုံတော့ ရိုက်လို့မရခဲ့ဘူး။ ရေစိုခံရှိရင် ကောင်းမယ်လို့ တွေးမိတယ်။ ပင်လယ်ရေထဲ ကူးပြီးရင် လမ်းဟိုဖက်တခြမ်းမှာရှိတဲ့ ရေကူးကန်မှာ ဆက်ကူးကြသေးတာ။
အွန်လိုင်းကမ္ဘာနဲ့ အဆက်အသွယ်ပြတ်နေတဲ့ ညက အေးချမ်းနေ သလိုပဲ။
ကားဆရာ ခေါ်သွားတဲ့ Pasar Oleh Oleh ဆိုလား အဲဒီစျေးတွေ၊ အဲဒီဖက်က နာမည်ကြီး စားသောက်ဆိုင် ဆိုတာတွေကြ စင်ကာပူထက်တောင် စျေးကြီးနေသလိုပဲ။ အဲဒီစားသောက်ဆိုင် နောက်မှာ ငါးကန်တွေတွေ့တယ်။
ဒီ Bintan Cabana နဲ့ တွဲရက် ပိုင်ရှင်တစ်ဦးထည်း ဖြစ်မယ်ထင်တယ် Bintan Agro Beach Resort ဆိုတာရှိတယ်။ အဲဒီကို shuttle bus အလကားစီး သွားလို့ရပြီး အဲဒီက စားသောက်ဆိုင်မှာ chili crab စားကောင်းတယ်ဆိုလို့ သွားစားကြတာ ကုန်နေတာနဲ့ ကြုံလို့ ငါးပေါင်းပဲစားလိုက်ရတယ်။ ကျွန်းဆွယ်အငူလေး ထိပ်က စားသောက်ဆိုင်လေးက ကဗျာဆန်ဆန်ပါပဲ။ လပြည့်နေ့ နဲ့ကြုံတယ်။ အဲဒီဖက်က ရေက သိပ်မကြည်သလိုပဲ။
No comments:
Post a Comment